Wednesday, February 23, 2005

من وحي الشيزوفرينيا الشخصية

2 x 3 = 6
أنا كنت اتنين تلاته
قعدتهم في الخلاء
زهقوا من غلب عيشهم
والشكوى من الغلاء

قالوا نطلع مرة رحلة
فكك من عيشة وحلة
دي مسيرها تروق وتحلى
ونقول الرزق جاء

الأول قام يغني
الواد أبو قصه بني
وده شاعر مش مغني
محمود أبو العلاء

والتاني بنص بعمة
نصاب ولا عنده ذمة
بيطنش في المهمة
وبيشتم في الغباء

والتالت قال أغاني
في العشق وفي الغواني
وعشان يرجع زماني
هارجع وأقول يا واء

يبقى الرابع صغير
وبحبه يا ناس كتير
هو في قلبي الضمير
والداء من غير دواء

والخامس باشمهندس
عايق لكن مفلس
يتنطط ع المدمس
ويغمس بالهواء

طلع السادس مصلي
في أدانه يقوم يعلي
يشكر ربه تملي
وبيحمد في البلاء

دول ستة وقطعوني
في مشانق علقوني
وبكيفهم وزعوني
في الأرض وفي السماء

لكن وقت المحبة
لموني حبه حبه
ورموني لبنت شابة
كان بيها الإكتفاء

0 Comments:

Post a Comment

Links to this post:

Create a Link

<< Home